Nýtt meistaranám í gervigreind og styrkur til náms í máltækni

Háskólinn í Reykjavík mun næsta haust í fyrsta sinn bjóða upp á meistaranám í gervigreind við tölvunarfræðideild skólans. Þótt HR hafi um árabil verið framarlega þegar kemur að kennslu og rannsóknum á gervigreind er um nýja námsleið að ræða og viðbót við það framhaldsnám sem er nú þegar kennt við tölvunarfræðideild.

Meistaranám í gervigreind er hannað til að veita nemendum djúpan skilning og færni í að þróa, þjálfa og nýta gervigreind í margvíslegum tilgangi. Auk þess munu nemendur kynnast þeim siðferðislegu áskorunum sem fylgja þróun og notkun tækninnar, og læra hvernig hægt er að nálgast þessar áskoranir á ábyrgan hátt.

„Það er afar mikilvægt að á Íslandi sé boðið upp á metnaðarfullt og framsækið framhaldsnám. Með því að efla sérfræðiþekkingu í gervigreind styrkjum við samkeppnishæfni landsins á alþjóðavísu og aukum tækifæri til nýsköpunar innanlands. Með þessu nýja meistaranámi í gervigreind leggjum við í HR okkar lóð á vogarskálarnar með það að markmiði að undirbúa samfélagið fyrir framtíðina,“ segir Henning Arnór Úlfarsson, deildarforseti tölvunarfræðideildar HR.

Samhliða þessari nýju námslínu hefur verið settur á laggirnar styrkur til meistaranáms í gervigreind með áherslu á máltækni (MSc in Artificial Intelligence with an emphasis on Language Technology; AILT).

Styrkurinn er nefndur eftir Baldri Jónssyni heitnum, prófessor í íslenskum fræðum, en hann leiddi fyrsta máltækniverkefnið sem unnið var á Íslandi. Í ár eru 50 ár frá því að niðurstöður verkefnisins voru gefnar út í verkinu „Tíðni orða í Hreiðrinu: tilraunaverkefni í máltölvun“ árið 1975. Vegna þessa verkefnis er íslensk máltækni því 50 ára í ár.

Styrkupphæð er sem nemur skólagjöldum meistaranema og er veittur til eins árs í senn. Styrkurinn verður endurnýjaður fyrir síðara árið í náminu ef styrkþegi sýnir góða frammistöðu í námi. Styrkhæfni verður metin út frá menntun, viðeigandi bakgrunni og innsendum gögnum.

Hér er hægt að finna frekari upplýsingar um námið og tengil á skráningu.