Jafnréttisdagar 2026: Possibilities for Women in AI

Á Jafnréttisdögum í febrúar hélt Women in AI vinnuhópur EDIH á Íslandi viðburðinn Possibilities for Women in AI í Hannesarholti þar sem fjallað var um tækifæri og áskoranir sem móta framtíð gervigreindar.

Viðburðurinn beindi sjónum bæði að möguleikum og takmörkunum gervigreindar og tók fyrir mikilvæg málefni á borð við skekkjur (bias) í gervigreindarkerfum, mikilvægi ábyrgrar þróunar og nauðsyn fjölbreyttra sjónarmiða við mótun nýrrar tækni. Rauður þráður í umræðunni var hvernig hægt sé að hvetja fleiri konur til að taka virkan þátt og leiðtogahlutverk innan sviðs gervigreindar.

Áhugaverður aðalfyrirlestur og fjölbreyttur pallur

Við vorum afar þakklát fyrir að fá Maríu Rún Bjarnadóttur, fulltrúa UN Women á Íslandi, sem aðalfyrirlesara.

Í pallborði sátu:

• Ólöf Rún Kristjánsdóttir, WomenTechIceland
• Stefán Ólafsson, Háskólinn í Reykjavík
• Helga Hauksdóttir, menningar-, nýsköpunar- og háskólaráðuneytið

Saman komu þau með fjölbreytt sjónarhorn á samfélagsleg áhrif gervigreindar, þá ábyrgð sem fylgir þróun hennar og mikilvægi þess að ólíkir hópar taki virkan þátt í að móta framtíðina.

Lifandi og opið samtal

Þó upphaflega hafi staðið til að skipta þátttakendum í smærri umræðuhópa þróaðist stemningin í salnum á annan veg. Umræðan varð fljótt opin og lifandi, þar sem áhorfendur tóku virkan þátt og áttu beint samtal við pallborðið. Þetta skapaði afar jákvætt, opið og samstarfsmiðað andrúmsloft — nákvæmlega þá tegund af samfélagi sem þarf til að knýja fram raunverulegar breytingar á sviði gervigreindar.

Í umræðunni kom einnig skýrt fram hversu mikilvægt er að fá karlkyns bandamenn inn í samtalið. Framfarir í átt að auknu jafnrétti í tækni eru sameiginlegt verkefni og þátttaka þeirra er lykilatriði í að byggja upp jafnvægari og fjölbreyttari vistkerfi í kringum gervigreind. Við hvetjum því eindregið fleiri karla til að taka þátt í áframhaldandi starfi vinnuhópsins.

Hvað er framundan

Þetta var annar viðburður Women in AI og áhuginn heldur áfram að aukast. Með því skapast sífellt fleiri tækifæri til að byggja upp sterkara og fjölbreyttara samfélag í kringum gervigreind á Íslandi og hvetjum við öll sem hafa áhuga til að taka þátt í Women in AI vinnuhópnum og skrá sig á póstlistann okkar.